À parlà di Canta

À parlà di Canta u populu corsu, par mè, vene quant'è à palisà una parte parsunale di a me vita. Quella chì ci feciu e me scelte future d'omu. Eramu à l'epica di ciò chì u tintu di Farrandu Ettori hà chjamatu in lu Mémorial des Corses "u miraculu di u sittanta".

Ci fù tandu un sbilanciu culturale di primura : l'isula intria in bullore criativu è rivindicativu incù e ghjurnate di l'Università d'Istate in Corti. A rivista Rigiru è u Teatru di ricerca tiravanu u solcu d'una sprissione litararia nova ; "Canta", diminutivu adupratu tempu trovu u nome di a nova furmazione, appiigava in lu duminiu musicale i trè principii di u riacquistu, di a inghjennatura è di a indiatura di l'opara difiniti da a sguatra di Rigiru .

U riacquistu cunsistia à turnà à impusissassi di u patrimoniu vechju, ad avenne cunniscenza è maistria di manera à sbuccà nantu à a inghjennatura di l'opara muderna : dì u mondu d'oghje senza sminticà u passatu. A indiatura punia u principiu di u ingagiamentu, di a ditarminazione in favore à un prugettu culturale è puliticu.

Canta hà vulgarizatu sti cuncetti in la so dimarchja : i spittaculi eranu veghje, s'andava pà sti paesi cù a primura di scatulì u cantu sminticatu, cù u so versu sputicu è rozu. Si facia a criazione cù l'appughju di e sunurità o di e seste puetiche tradiziunale, si visticavanu e strade nove, arrimbate à genari musicali d'altrò, robba di folk song o d'America Suttana pà u più. Ùn si spiccava a sprissione musicale da l'affirmazione culturale è pulitica : quelli di Canta eramu militanti, micca cantadori o musicanti, impignati indi a lutta di u populu corsu. Cusì ùn si trattava di caccià u minimu prufittu parsunale è s'andava tante volte à cantà pà i prighjuneri pulitichi, cusì s'aiutavanu i membri di u gruppu chì si vulianu stallà in li so paesi.

Canta hà cacciatu u so prima discu in lu 1975. Appronta u prossimu in lu 2001…Vinti sei anni d'una vita à quandu linda, forte, à quandu pinosa è tribbulata, chì s'affirmenu oghje ind'una prisenza musicale sirena è soda. Oramai a furmazione hè un bè cumunu di i Corsi : da ella sò isciuti tanti musicanti, cantadori è criatori. Dopu à cinquanta anni di silenziu smurtitu, Canta hà turnatu à dà a so dignità à u cantu corsu è à quelli chì u purtavanu.
Oghje à Canta u stemu à sente assucenduli par sempre st'idea : campa u populu corsu.

Pasquale Ottavi