Cambiatu è listessu...

Annu passatu, Canta u Populu Corsu festighjava i so trenta anni. Trenta anni sò pocu è sò assai : à chì dicerà «digià !», à chì dicerà «trenta anni soli !». In ogni mondu, sò sempre quesse l'occasioni di ghjudicà u tempu chì passa è di truvà, segondu l'idee o a circustanza, ch'ellu passa o pianu pianu o troppu prestu. Di fatti, si pò esse à trenta anni in cor di giuventù quant'è entre in età matura; si pò esse à veranu verdicente o à vaghjime venutu, è pè lascià corre u parangone da prufanu à sacratu, postu chì i nostri cantadori ci si intendenu in tremindui i campi, a trentina pò esse l'étà di l'assunte gloriose quant'è quella di dulori è crucifissioni. Si parla appuntu di u gruppu cum'è d'una persona sola, d'un caratteru unicu, è ancu per ùn vulè cascà ind'i l'agiografia, ci vole à adimette, ancu contr'à ogni realità ordinaria, ch'ellu impone a so unità è a so putenza, cum'omu ci s'aspetta da u mitu ch'ellu hè in qualsiasi di manera diventatu. U dettu mitu t'hà purtantu a so carta d'identità postu ch'ellu saria natu un 15 d'aprile di u 1976 in Alata, à l'osteria di A Stalla : hè ciò ch'ellu dice propiu l'arrigistramentu in prefettura di u picculu associu ch'avia da purtà durante trè decennii u rinnovu culturale di a nostra isula ind'u campu di u cantu di spressione corsa. Si hè parlatu assai di u gruppu, articuli è libri, ammirazione è critica imbulighjate : s'hè ancu pruvatu à scrive a storia di issa passata strasurdinaria, circandu chjavi spiegative, interrugandu evenimenti è cuntegni, fendu l'analisi di u stile è di l'estetica, di l'attichji pulitichi è culturali, d'ogni sborru è ancu d'ogni mancanza : si hè ottenutu cusì sintesi di valore, si hè apertu strade pedagogiche assai, senza avè puru assiccatu un sugettu riccu sempre d'ùn esse micca turnatu un munimentu impetratu di u passatu, ma fermatu vivu è cambiarinu à misura ch'ella cambia a storia di a cumunità duv'ellu s'hè sempre vulsutu arradicà.
Aghju rilettu per l'occasione tutta issa literatura duv'elle rivenenu à spessu e parulle è l'idee di sulidarità, di generosità, di fede ind'u cullettivu, di rispettu severu di i principii... Ghjè quessu daveru u culore essenziale di u caratteru di u gruppu : pocu impreme quant'elli sò stati è quant'elli sò quelli chì u cumponenu, s'ellu hè venutu è torna à vene numerosu u publicu, nè mancu e cundizioni di a ricevitura publica ! Ciò chì conta per elli ghjè sempre l'ideale d'una indiatura, ghjè u militantisimu, ghjè l'appartenenza cumunutaria ! Ùn si tratta micca per elli nè di u prufeziunalisimu stremu, nè di amasgiulere elitiste è culturali, per via di a musica è di u cantu, nè di lasciassi piglià da a facilità nata da a nomina, nè di lentà ogni pratica di rigore o di sacrifiziu à a causa cullettiva ! Cumu ùn ne saria impressiunatu l'osservatore, ancu oghjeghjornu chì i successi di u cantu corsu nant'à e scene internaziunali parenu d'avè mudificatu certi punti di vista ?
Chì ponu scumudà tandu qualchì zirmarella, qualchì picchiglia, qualchì sbagliu, qualchì assenza ? Qualchì passu in bisbò, qualchì strada quatrochja, qualchì incaminata più individuale ?
D'altronde isse stonde à l'inforse, issi incidenti ùn sò mai riesciuti à supranà in core di nisunu di questu o di quillaltru, u sintimu d'appartene à u gruppu cum'è in alta fedeltà à i valori essenziali, à a forza di l'ideali, à l'ingagiamentu à prò di u cumunu.
Si pudia teme chì u gruppu fermassi prigiuneru à beternu di a so fiura, incapace di ringhjennassi senza perdeci l'anima pè u sempre. E ci hà pruvatu vultendu ch'elle eranu intatte e so putenzialità creative, ci hè parsu rivittulitu è sodu quant'è nanzu ind'i so panni novi.
Qualchidunu di l'animadori storichi, sempre prisenti à latu di i giovani ricutati, guidanu avale cù a so sperienza voci belle è attalentate.
U gruppu ùn hè più di sicuru affattu u listessu, ma hè sempre Canta U Populu Corsu chì ci piace da tantu ch'elle sò di qualità l'interpretazioni, i testi, l'armunie, tutte fermate esempiarie. Cambiatu, hè turnatu listessu ! Hè forse custì u misteru di a so rinvivita ! Un pocu cum'ellu a suggerisce issu versu, enimmaticu dinù ellu, chì mi vene in capu : «Tel qu'en lui-même enfin l'Eternité le change». Ma si pò pensà dinù à un pueta corsu, cum'è Franchi, quand'ellu dice «Forse si chjama eternità l'ultima stonda di rivolta».

Ghjacumu Fusina