" Canta " incanta in u so innu à a Corsica

Cù u so discu " Rinvivisce ", u gruppu " Canta u Populu Corsu " esce da un silenziu sudiosu per affirmà a so vuluntà di vive malgradu e tragedie, è celebrà à traversu melodie suntuose, a lingua, a cultura, a terra. Un discu esciutu da e viscere di a passione.

Antone Leonardi hè un omu cumpiitu. Un perfeziunistu suddisfattu di u travagliu fattu dipoi parechji anni per dà à a canzona, è à i cantatori corsi a piazza ch'elli meritanu. In vinti sette anni di faccende, hà permessu a nascita di talenti, è hà datu à un gruppu i mezi di mettesi in valore. Tuttu hè principiatu un ghjornu di u 1975 cù u famosu " Riacquistu ", sta vuluntà di riscopre e radiche di l'anima corsa, è à traversu ste radiche a riapprupriazione d'una cultura autentica, ma minacciata. " Eri, Oghje è Dumani " fù u primu discu d'un cambiamentu, quellu di a cunfirmazione d'un gruppu chì avia da reabilità a vucazione originale di u cantu. U tempu hè scorsu, i disci dinù, è, à traversu i drami d'un'isula, l'omi di u gruppu " canta " sò ingrandati, è sò diventati più maturi, lasciendu à piazza à i giovani trasmettenduli l'amore di l'isula è a filosufia d'un populu, di a so cultura. A melodia hè sempre incantevule, e puesie, d'una grande purezza, pruvucheghjanu l'emuzione. Hè ricunfurtante di vede chì " Canta ", resta fidu à a so filosufia testimuniendu di e periode difficile, è di i mumenti tragichi chì anu culpitu assai i figlioli è e famiglie di st'isula. Sedeci tituli assignalati " Ti vurria dì " di Ghjuvan Claudiu Papi, parulle di speranze " in un'alba chjara di libertà ", o a canzona di Michele Cacciaguerra, " U versu naturale ", un cantu originale chì face ritruvà a fede, " spechju di i veri valori di a vita ". Natale Luciani, l'anima di u gruppu, famosu autore cumpunitore discrive un " Chjaruscuru ", maestosu chì invita à a pace, " core in fronte, strada diritta ". L'impronte di Canta sò inalterevule. U discu, in vendita dipoi qualchì ghjornu cunnosce un successu scemu. Di i 10 000 esemplarii distribuiti in tutta a Corsica, nè resta belli pochi. U successu hè à l'appuntamentu. Qual'hè chì nè dubitava ?