CHJAMU A PUESIA

De "Mal'cunciliu" à "Corsica nazione", d'autres images sonores... Mystère des arbres- mythes, force des convictions, foi en l'avenir... Autant de moments de peur, de doute, de joie et d'espoir aussi... Les voix chantent la vie, toujours...

Mal'cunciliu
Arietta
U vagabondu
Lettera a mama
L'odore di nostri mesi
L'ancura di a misericordia
L'almanacu
Amicu ci si tu
Quandi a terra move
Corsica nazione

Mal'cunciliu

(Ghj.P. Poletti)

Tù si l'alburu di lume
è ne veni da luntanu
Tù si lu tonu e lu fiume
è Lesia chi canta pianu

Tù si l'errante d'amore
Chi camina in la muntagna
Tù si l'omu chi si more
Quandu fala l'ombra pagna

È quandu a notte ti porta
E voce di Torremorta
È chi u cantu di l'onda
Colla da a terra prufonda.

Tù si l'alburu di sognu
Scurticatu da lu ventu
Tù si anghjulu o demoniu
A carezza o lu spaventu.

Tù si gioia o dulore
Ma cun tè mi meravigliu
Sò natu in lu to furore
Mal cunciliu

Arietta

(D.A. Versini/Ghj.P. Poletti)

Quand'ella canta in mè quell'aria languente
Naviga in dolci mari la me fantesia
Di l'albe chi ùn sò più risplende la magia
Tutta la giuventù si leva è m'hè prisente

Correnu dananzu à l'ochji meravigliati
Catene di monti turchini à l'infinitu
Pinete è valdi cupi è machjetu fiuritu
Calanche è scogli da lu mare flagilati.

Scopru à li fianchi d'una sarra appiticate
Accolte a brada cume capre in lu piazzile
Di tondu à la chjesola cù lu campanile
Casarelle di petra nuda musgingate.

È l'ora calma induve lu cansa lu gjornu
A campanella chi chjocca l'Ave Maria
I campagnoli sparsi invitu à lu ritornu
A banda di le sgiotte affulena la via.

U sole s'hè ciuttatu una ghitarra sona
Un'ardita brunetta affacca à lu purtellu
È lampa un carofulu rossu à lu zitellu
Innamuratu chi li canta la canzona.

U vagabondu

(Ghj.P. Poletti)

Una fata peregrina s'hè calata in lu mio core
Ella guida la mio strada cun furtuna è cun amore
Corre corre a l'infinita u ventu di la mio vita (bis)

Cum'è pane d'ogni ghjornu aghju una sporta di stelle
Per a luna è per u sole scrivu le mio riturnelle
Corre corre a l'infinita u ventu di la mio vita (bis)

Quandu d'inguernu la neve mi trova per s'alte cime
Cercu sempre qualch'agrottu per finisce le mio rime
Corre corre a l'infinita u ventu di la mio vita (bis)

Cum'è sposa aghju una musa, cum'è lettu aghju la terra
E le mio sole cunfine sò la muntagna e la serra
Canta canta a l'infinita u ventu di la mio vita (bis)

Letter'a mamma

(Cantu tradiziunale/Musica tradiziunale)

Mamma risponde n'un possu a le vostre dulente chjame
Troppu miserie aghju adossu e mi si rode la fame
So prigiuneru languente in l'aria prussia a punente

Venisse una rundinella ch'eo la mandi messagera
O venga puru una stella a purta la mio preghera
Le mio pene e lu mi amore versu voi mamma d'amore

V'abracciu per lu penseru vi mandu sti versi soli
Dicendu so prigiuneru chi tuttu que vi cunsoli
Mamma la vostra tristezza a me da tant'amarezza

(Paghjella)

L'odore d'i nostri mesi

(Ghjacumu Fusina/Ghj.P. Poletti)

Ottobre sente e castagne
In paese fumicosu
Quand'u celu nebbiacosu
Fala nant'à le muntagne
Pare tutt'avvene chjosu
È finite le cuccagne.

Dicembre sente l'aranciu
Chì fiurisce per'sse piaghje
Ma quandi lu ventu traghje
Piglia inguernu lu sbilanciu
Tempu d'acque è di nivaghje
Affanosu è pocu danciu.

Maghju sente la ghjinestra
Chì sbuccia per lu pughjale
Inzeppisce fiuminale
Verdiceghja la campestra
L'acelli sparghjenu l'ale
Si spalanca la finestra.

Aostu sente a filetta
Calpighjata a merendella
A notte s'empie di stelle
Di dulcezza benedetta
In core di le zitelle
C'hè un fiore chì l'aspetta.

Chì senteranu li mesi
Di la prussima stagione
Duve piantera viaghjone
Cù le so sperenze appese
È basteranu e canzone
Per guarì tutte l'offese ?

L'ancura di a misericordia

(Ghj.P. Poletti)

Messageru di a storia
Quand'è tù ghjunghji in sagone
Dà un'occhjata à l'orizonte
È ascolta lu marone
Senterai qualchì voce
Di stu fattu testimone.

Eranu tant'omi fieri
Tutti di ceppu lucale
Nant'à un battellu sbrancatu
In pettu à lu tempurale
Sott'à un celu spaventosu
Cum'è le porte murtale.

Si stracciava ogni vela
Un ventu forte stridava
Più l'omi tenianu morsu
Più l'onda si scatenava
È à l'unu è l'altru latu
A morte già s'affiancava.

Cum'è una bestia ferita
È senza speranza alcuna
Strinti in un ultimu fiatu
L'omi sciolsenu la funa
À quale ci era anudata
Cù l'ancura di furtuna.

Ad ùn trattu u bastimentu
Cum'è un cavallu dumatu
Fù scacciatu da l'infernu
U tempu s'era fermatu
L'omi casconu in preghera
Fin' chì u mare fù calmatu.

Quandu u celu fù serenu
Ognunu purtava in gloria
L'ogettu di a so salvezza
Chjamatu misericordia
Fù lasciatu sopr'à locu
È stampatu in la memoria.

Ma in fondu di lu mare
Oghje ch'hè oghje in Sagone
A rena hè più chè nuda
Un furesteru latrone
S'hà coltu senza vergogna
Quella ancura testimone.

Avà corsu stami à sente
Sta canzone ùn hè finita
Fatti onore à ripiglià
Un pezzu di a to vita
È lampa fora stu latru
À la manu troppu ardita
È lampa fora stu latru
À la manu troppu ardita.

L'almanacu

(Cantu tradiziunale/Musica tradiziunale)

O guarda tù l'almanacu
L'annati sò tutti pari
Quale canterà li nanni
Di la sera di Natali
Parch'eo di sentire à tè
M'hè difesa par avali.

Or sunatu n'hè lu primu
Lu terzu cù lu sicondu
Ma eo ùn lu vegu indocu
Lu caru lu mè culombu
Forza si sarà nascosu
Sottu li rami di l'olmu.

Ad'avali sorti la messa
Poi sortinu tutti fora
È vanu à la pruminata
Com'hè l'usu à la scola
Ma eo lu vecu indocu
Lu mè fiori di la viola.

La mani di vennari santi
Quandi facinu lu ghjiru
Quale purterà l'umbreddu
Di lu santu baldacchinu
Parchì son com'è l'aceddi
Quandu persinu u so nidu.

Amicu ci si tu

(Ghjacumu Fusina/Ghj.P. Poletti)

Amicu, ci sì tù chì ci porghji la manu
Quandi u ventu gira ind'u celu isulanu
Quandi u sensu spira ind'u cerbellu umanu
Amicu,ci sì tù

Amicu, ci sì tù chì ci porti penseru
Quandi u morsu stringhje di ferru furesteru
Quandi l'ochju dinnera da lu vechju addisperu
Amicu,ci sì tù

Amicu, ci sì tù chì copri lu dulore
Quandi a brusta ghjala u focu di l'amore
Quandu a fede cala in core traditore
Amicu,ci sì tù

Amicu, ci sì tù chì ci apri le porte
Quandi l'idea move nant'à le strade torte
Quand'ellu sbuccia un fiore cum'è sognu di morte
Amicu,ci sì tù

Amicu, ci sì tù chì ci dai sperenza
Quandi a vita cagna ci tomba fratellenza
Quandi a terra cara si sfuma in la partenza
Amicu,ci sì tù

Amicu, ci sì tù chì ghjetti lu mandile
Quandi u tempu vene d'ùn esse più ghjentile
Quand'elle vene l'ora d'ùn esse più civile
Amicu, ci sì tù
Amicu, ci sì tù

Quandi a terra move

(Ghjacumu Fusina/Ghj.P. Poletti)

Quandi a terra move
Sott'a la sciappitana
Di corsica luntana
Mi vogliu avvicina

Sentu chi l'aria trema
Ch'ellu mughja lu mare
Ava si chi mi pare
Stu ventu girera

Issa terra hè la nostra
Nisun ci po pretende
Ormai un n'hè a vende
Un vale a pattighja

Ci so nati l'antichi
Dapoi la filitosa
La vulemu fa sposa
Quelle so liberta

Sona lu vecchju cornu
Sopra lu mondu novu
Per mettel'a u provu
L'amore di qualla

E imbrusche so in lu saccu
Chi la mio manu un tremi
Chjunti a li punti stremi
A scelta si fara

Simu l'eredi ghjusti
Di corsica strziata
corsica marturiata
Ti vulemu aiuta

Corsica nazione

(U Niulincu/Musica tradiziunale)

O fratelli patriotti
Di spiritu naziunale
Chi vulete esse sciolti
Da e putenze culuniale
Oghje le prigiòne francese
Crescenu le vostr'offese.

Si stringhje lu nostru core
Di sapevvi incarcerati
Spartimu listess'amore
È ci sentimu inghjuliati
Site lu sangue è la forza
Di a nostra terra corsa.

Vi sarà longa la strada
Duri saranu i passi
E da lu pianu a la sarra
Indu l'andati è i chjassi
Truverete e vistighe
Di tante battaglie antiche.

A Francia vi dà l'agrottu
In fondu à le so furturezze
Ma u soffiu patriottu
In ogni pieve si tesse
È risorge la passione
Di la Corsica Nazione.

(Paghjella)

Haut de page