FESTA ZITELLINA

- Parolles -

Festa zitellina
A mio lingua
Barabattule
Tessila tù
Bianchina
Maria Muvrella
Un paesaggiu cusi
Nannuccia
Quandu seraghju piu grande
A strada, a vulpi e u banditu
U baullu
U focu
Cecceccu è a pulenda
Supplica à i nostri maestri
Principellu
À a sbunurata
Topu pinnutu
A manu
U Rè di u pullinaghju
Induvinella
I mo misgiucci
Una volta ci era un Rè
Filastrocche
A polvera di grossu minutu
Rundinella
Suppa sumentrà

Festa zitellina

(G.G. Franchi/Ghj.P. Poletti)

À passi di ghjatta
A neve s'aguatta
È piglia è sì piatta
In ogni furcò.

Piove piove latte
V'aggranca le patte
C'hè pocu à scumbatte
O sgiò Calafrò.

Si vede sumeri
Arechji in pinseri
Umbrosi mazzeri
Pè 'ssi cacciarò.

Sò fatti à frisgetti
I nostri fussetti
Sò in biancu li tetti
Chì bella staghjò.

Evviva li stracci
Prestu à vultulacci
-Ingrati zitellacci
-Perchè o Babbò?

U ventu sculiscia
Lascendu una striscia
Di bambace liscia
Soprà li machjò.

U ventu rumena
U celu sumena
L'angoscia è la pena
Di l'omi maiò.

A mio lingua

(Ghjacumu Fusina/P. Gattaceca)

Russignolu canta
È corbu rachja
A mio lingua hè
Di petra è di machja.

U versu incanta
Sona la cetera
A mio lingua hè
Di machja è di petra.

U ventu soffia
A cità trema
A mio lingua hè
Calamita è gemma.

Populu hè fattu
Voce hè unita
A mio lingua hè
Gemma è calamita.

U tempu passa
A storia si face
A mio lingua hè
L'avvene è la pace.

A fola nasce
A mente si tene
A mio lingua hè
A pace è l'avvene.

Barabattule

(Ghjacumu Fusina/P. Gattaceca)

Staccia farina
Di la statina
Calicaloce
Sott'à la noce
Bella farfalla
In l'aria balla
È casca ciatta
In la pignatta.

Tessila tù

(Cantu tradiziunale/Musica tradiziunale)

Tessila tù
Tessila eo
Tessila tutta la nostra tela
Tessila bianca
Tessila nera
tessila tù chì sì
Ghjuvanni Matteu.

Bianchina

(Ghj.P. Poletti)

C'era una capretta bianca
Chì si ne vulia andà
À girà per la muntagna
Chjosa ùn vulia più stà,
À girà per la muntagna
Chjosa ùn vulia più stà.

Nant'à e cime sott'à e stelle
Eo vogliu caminà
Cù le muvre è le muvrelle
Ci puderaghju saltà,
Cù le muvre è le muvrelle
Ci puderaghju saltà.

U filanciu cù l'altagna
Mi lasceranu chjucà
Sott'à i bassi in l'erba pagna
Eo mi vogliu cincinà,
Sott'à i bassi in l'erba pagna
Eo mi vogliu cincinà.

U cuccu trà mez'à e fronde
Per mè sola canterà
È faremu tante ronde
Trè ghjorni senza piantà,
È faremu tante ronde
Trè ghjorni senza piantà.

Quandu u chjoccu di a campana
Versu sera cullerà
Vicinu à una funtana
Eo mi vogliu addurmentà,
Vicinu à una funtana
Eo mi vogliu addurmentà.

Un bellu ghjornu di maghju
A capretta si n'andò
L'acula pronta aspettava
Chì prestu l'accumpagnò,
L'acula pronta aspettava
Chì prestu l'accumpagnò.

C'era una capretta bianca
Chì si ne vulia andà
À girà per la muntagna
Chjosa ùn vulia più stà,
À girà per la muntagna
Chjosa ùn vulia più stà.

Maria Muvrella

(Cantu tradiziunale/Musica tradiziunale)

Truc è zò Maria Muvrella
Truc è zò Maria Muvrò
Truc è zò cavallu grisgiu
Maria Antonia
Hà fattu un misgiu
Pelu rossu è ochju grisgiu
Un misgiu miaulava
Maria Antonia
L'annannava.

Un paesagiu cusì

(A.F. Filippini)

Una muntagna turchina
Quaiò lu mare d'argentu
A luna tonda chì u ventu
Da un celu à l'altru cincina.

Ogni pueta hà inventatu
Un paesagiu cusì
Eo ùn ci credu, peccatu
Sì corsu ? Nò, eo sì.

Nannuccia

(Ghjacumu Fusina/P. Gattaceca)

Ciucciu lu mio ciucciu
Tù chì sì un umucciu
Ti dicu chì u mondu ùn hè
Mai più cum'è da zitè.

Ciucciu lu mio ciucciu
Lu mio figliulucciu
Stà à senta à babbà
Quante cose ch'ellu sà.

Ciucciu lu mio ciucciu
Tù chì sì chjucucciu
A vita t'amparerà
L'avvene ch'ellu ùn si sà.

Ciucciu lu mio ciucciu
Lu mio zitellucciu
Ai intesu u to babbà ?
Innò, chì dormu digià !

Quandu seraghju più grande

(Ghjacumu Thiers/Musica tradiziunale)

Quandu seraghju più grande
Vogliu fà u mo giardinu
Suminacci i mo sogni
Annacqualli à fantesia
È pè pagà i mo legumi
Mi ferete una puesia
Puesia di legumi
Fantesia di i mo sogni.

Quandu seraghju più grande
Vogliu esse un sgiò duttore
Pè guarisce u nostru mondu
Quattru salti ogni matina
È un zinzicu d'allegria
A matina di lu mondu
Allegria cusì longu.

Quandu seraghju più grande
Vogliu purtà un avione
Pè curane la mo terra
Da la matina à la sera
Teni belli i mo lochi
È francalli da i fochi
Cusì bella la mo terra
Da la matina à la sera.

Quandu seraghju più grande
Ùn ne vogliu avè barretta
Nè cheppi nè berrettinu
Nè galloni nè trumbetta
Vogliu cù un cornu marinu
Sunà l'ora di u vesperinu
Un cornu marinu
Face un spuntinu
Cù lu berrettinu.

A strada a vulpi è u banditu

(N. Paganelli)

Dormiu in'alivetu
Un vechju m'hà tuccatu
O fiddolu chì pensi d'a ghjustizia
Chì pensi d'a sventura
Mi pari beddu ghjovanu ma ascolta
Hè un omu chì ti parla
Fighjulaiu u so fucilu
A so pistola
Fighjulaiu u so ghjacaru è a so barba bianca
Aghju pinsatu
Eccu un banditu corsu.

U baullu

(Ghjacumu Fusina/P. Gattaceca)

In fondu di u mare
Ci hè un baullò
Scultatu di legnu,
È chjusu à bullò
È chjusu à bullò.

Posa nant'à rena
Cum'è un papachjò
È li pesci bianchi
Li giranu intò
Li giranu intò.

Sopra, nant'à l'acqua
Passa un vapò
Chì di fume innacqua
U celu à l'aritrò
U celu à l'aritrò.

Chì ci serà dentru
À'ssu baullò ?
Ùn si pò sapene
Ch'hè chjusu à bullò
Ch'hè chjusu à bullò.

Ch'ellu ùn sia viotu
Quessu lu casciò
Pè dà à riflette
À tè, o baullò !

U focu

(A.D. Monti)

Sò u focu spatronatu
Natu à casu
D'un ghjocu di zitelli
À mezi correnti
In un coscogliulaghju.

Cogliu l'aria chì traghje
È m'imbotru di ventulelli

Sò u focu bastardu
Rodu è macinu
Mandu in pulvina
Senza riguardu
Pè i castagni
Duve sò natu.

È poi battu e foragne
È l'omu spaventatu
Sona
U campanone.

Cecceccu è a pulenda

(Ghjacumu Thiers)

'Ssa chjuccaccia di Cecceccu ùn vole micca manghjà a pulenda.
-Manghja a to pulenda, dice a mamma ;
-Aù ! Mancu pè more !

Allora a mamma si inzerga è mughja :
"O mazza, mena à Cecceccu ch'ùn vole micca manghjà a pulenda !"

Ma a mazza ùn si move.
"O focu, brusgia a mazza ch'ùn vole micca minà à Cecceccu ch'ùn vole micca manghjà a pulenda !"

Mà u focu ùn si move.
"O acqua, spenghji u focu ch'ùn vole micca brusgià a mazza ch'ùn vole micca minà à Cecceccu ch'ùn vole micca manghjà a pulenda !"

Mà l'acqua ùn si move.
"O boie, bei l'acqua ch'ùn vole micca spenghje u focu ch'ùn vole micca brusgià a mazza ch'ùn vole micca minà à Cecceccu ch'ùn vole micca manghjà a pulenda !"

Mà u boie ùn si move.
"O funa, leia u boie ch'ùn vole micca beie l'acqua ch'ùn vole spenghje u focu ch'ùn vole micca brusgià a mazza ch'ùn vole micca minà à Cecceccu ch'ùn vole micca manghjà a pulenda !"

Mà a funa ùn si move.
"O topu, rodi a funa ch'ùn vole micca ligà u boie ch'ùn vole micca beie l'acqua ch'ùn vole micca spenghje u focu ch'ùn vole micca brusgià a mazza ch'ùn vole micca minà à Cecceccu ch'ùn vole micca manghjà a pulenda !"

Mà u topu ùn si move.
"O misgiu, manghja u topu ch'ùn vole micca rode a funa ch'ùn vole micca ligà u boie ch'ùn vole micca beie l'acqua ch'ùn vole micca spenghje u focu ch'ùn vole micca brusgià a mazza ch'ùn vole micca minà à Cecceccu ch'ùn vole micca manghjà a pulenda !"

È tandu...
U misgiu tira un saltu... è si manghja u topu chì si rode a funa chì lega u boie chì si beie tutta l'acqua chì spenghje u focu chì brusgia a mazza chì mena à Cecceccu...
È chì face Cecceccu ?
Si techja di pulenda.

Supplica à i nostri maestri

(Ghj.T. Rocchi)

Dice chè vo site cusì bravi
Chè vo sapete tanti è tanti affari...
Ci ferà prò !...
Ùn v'esceremu, noi nò, di tondu
Inseme parteremu à
Scopre u mondu di u sapè
Granerà filu à filu a sumente
Ma...Vo vulete facci u spannamente
Allora sì
Una volta pè sempre sia detta :
Maestri ùn vi scurdate di a filetta !

Principellu

(Ghj.P. Poletti)

Principellu, Principellu
Cusì graziosu è bellu
Imprestami le to mane
Ch'eo ne fia trè cullane
Cum'è un anticu tesoru
È trè spurtelli di stelle
Da sparte cù le zitelle.

Principellu, Principellu
Cusì graziosu è bellu
Imprestami le to mane
Ch'eo ne fia trè funtane
trè funtane canterine
D'acque chjare cristalline
È centu mila canzone
Da cantalle cun babbone.

Principellu, Principellu
Cusì graziosu è bellu
Imprestami le to mane
Ch'eo ne fia trè campane
Trè campanelle d'argentu
Per accumpagnà lu ventu
È centu fiori sbucciati
Cusì dolci è prufumati.

À a sbunurata

(Ghjacumu Fusina)

A valle s'hè croscia
Di vazza calata
A notte s'hà lasciatu
Quì è culà duie ombre
Sott'à i castagni insunnuliti
A machja ùn parla ancu
È u celu s'hè grisgiu
A mio stradella ciotta è passa.

Long'à u fiume diciulone
È leva ogni vistica
È muschi zitellini
Una tintenna persa
Trinneca qualchì tirlu
Sott'à a filetta azeza,
È v'anscia in faccia un'aria
Chì parturisce fole:
Stamane mi ne vò
Ad aspettà u sole...

Topu pinnutu

(Cantu tradiziunale/Musica tradiziunale)

Topu pinnutu
Chì vai di notte
Pichjendu à le porte
Topu pinnutu
Cascami in manu
Ti daraghju
Un bacin'di granu.

A manu

(Ghj. Nottini)

Ditu mignuculellu
Fior'di l'anellu
Longu lungonu
Fior'di la manu
Sciappa pidochju
È metti in lu zanu.

U Rè di pullinaghju

(M. Acquaviva/S. Giudicelli)

A nostra ghjallinella
Avia persu un ovu
È a mio ciucciarella
Ind'un scornu l'hà trovu
A nostra ghjallinella
Dipoi u s'hà covu.

Da st'ovu un piulellu
Culor'di focu hè natu
Fù messu ind'un spurtellu
Man'è sera hè curatu
Da la mio ciucciarella
Cù a nostra ghjallinella.

U piulellu diventa
Pianu pianu ghjallettu
Bellu spessu spaventa
Cappiendu u so stridettu
A nostra ghjallinella
Cù a mio ciucciarella.

Quandu sarà maiò
Farà anch'ellu lege
Cum'è un papachjò
Pratindarà direge
Falchi è rundinelle
Lioni è picurelle.

Induvinella

(Ghj. Nottini)

A mio gamba hè senza pede
È mi ferma un muzzicone
Fendumi l'operazione
Solu sale s'impieghede
Aghju pratensione è fume
Quantunque chè sia infermu
Ma un bel'ghjornu ùn vegu lume
Solu cù l'ossu mi fermu
Quale sò ?

(u prisuttu.)

I mo misgiucci

(Ghjacumu Thiers)

I mo misgiucci
Sfacciati sfacciati
Cù i so nasucci
Fatati fatati
Sgrignanu l'usciu
O lu rimusciu !

U sale basgia a cunfittura
L'ove s'anneganu in u sdruttu
U mele trova u prisuttu
Correnu i topi o chì primura.

Sonanu tutte e paghjulette
U paghjulone li face u bassu
Ancu a cazzarola u si piglia
In braccetta.

I mo misgiucci
Mughjati mughjati
Cù i so musucci
Sgranfiati sgranfiati
Ghjè chjosu l'usciu
Ùn c'hè rimusciu.

Una volta ci era un Rè

(Gregale)

Una volta ci era un rè
N'un castellu, n'un castellu
Una volta c'era un rè
Figlioli ne avia trè.

U primu u tenia à fà
N'un castellu, n'un castellu
U primu u tenia à fà
Chjosu in stanza ad amparà.

Quill'altru dicia: "o bà !"
N'un castellu, n'un castellu
Quill'altru dicia: "o bà !
U mondu vogliu girà !"

È lu terzu per cambià
N'un castellu, n'un castellu
È lu terzu per cambià
Era sempre à caccighjà.

Una volta riscuntrò
N'un castellu, n'un castellu
Una volta riscuntrò
Pasturella per stradò.

Sè tù mi voli spusà
N'un castellu, n'un castellu
Sè tù mi voli spusà
Regina ti vogliu fà.

Ma preferiscu à Francè
N'un castellu, n'un castellu
Ma preferiscu à Francè
Ch'hè pastore cum'è mè.

Pasturella disse nò
N'un castellu, n'un castellu
Pasturella disse nò
U principe n'un spusò.

'Ssa fola ziù cuntò
N'un castellu, n'un castellu
'Ssa fola ziù cuntò
Una sera à lu fucò.

Filastrocche

(P. Ottavi)

Ci era un ghjattu pazzu
Drentu à u so palazzu
Affacca un topu grassu
Chì trascinava un sassu
Affacca un tuparellu
Trascinava un spurtellu
Affacca un singhjarone
Purtava un lamaghjone
Affacca ancu una merla
Chì purtava una ferla
Poi c'era ancu una scimia
Carriendu a mè rima
È quellu bagliagacciu
Li frisgiò lu mustacciu
À quellu ghjatti ghjattone
Cioncu cum'è un campanone !

A polvera di Grosso Minutu

(Cantu tradiziunale/Musica tradiziunale)

Grossu Minutu
ghjunghje in paese
à vende a pulveretta ...

Rundinella

(Ghj.P. Poletti)

A campagna hè cusì bella
Sò sbucciati tanti fiori
A farfalla balla anch'ella
Hè a festa di i culori.

Rundinella, rundinella
Cun tè mi ne vogliu andà
Versu u sole, versu u sole
À l'orizonte culà.

U ventu soffia in lu celu
Face cantà lu mulinu
Rallegra lu pasturellu
Prufumendu u so caminu.

Canta, canta la vadina
Trà le petre è lu trifogliu
A vulpaccia di rapina
Si piatta daret'à un scogliu.

Suppa sumentrà

(Cantu tradiziunale/Musica tradiziunale)

Ghjocu Niulincu
Un zitellu dumanda a l'altru quant'ellu hà castagne ind'u sacchettu
S'è a risposta hè ghjusta vince u sacchettu

Haut de page