SINTINEDDI

- Parolles -

Viaghji
Sintineddi
E muntagne d'Ese
U valdu di a lama
A dota
Beal feirste
In memoria
Più chè u sole
Donna nera
Lettera d'Argentina
Tù Dumenicu
Diana di l'alba
Llego con tres heridas
Rimori

Viaghji

(Ghj. Fusina & Ghj.F. Leschi/E. Gineste)

Da scopre venti simu nati
Cum'è l'acelli benedetti
Chì si lascianu nidu è tetti
Quand'ella vene l'inguernata

Simu sempre à valisge fatte
Simu sempre à mezu à le mosse
Pocu ci impremenu le scosse
È pocu dinù le disfatte

Cum'elli sò belli i viaghji
L'avviò li treni è li battelli
È di stradò li riturnelli
Cù centu mila paisaghji

È po li cavalli d'idea
I più maravigliosi sogni
I più primurosi bisogni
A nostra più bella epupea

Ma chì ci moverà le voglie
Chì ci mette l'ale à i pedi
È ci accarezza vulinteri
Cum'è l'acqua nantu à le foglie

Quand'ella corre liberata
Ch'ella canta e so canzone
Nant'à a ringhera di u balcone
È ch'ella leva una ventata

SIMU DI QUELLI DI PARTENZA
SIMU DI QUELLI DI VULTATA
CUSÌ RINOVA L'ABBRACCIATA
CUSÌ RIBOMBA LA SPERENZA

Sintineddi

(F. Lanfranchi & N. Luciani/E. Gineste)

Tali un ochju lampatu à u mare latinu
O una mani porsa à l'imperi à liventi
Un sognu maladettu d'eternu scarpiddinu
O una chjama antica chi più nimu n'ùn senti

Tali i voci chi funu da culandi à l'ora
E li visi di petra chi dissinu di nò
Quidda sumiglia strana chi ùn si volsi mora
E l'idea chi tandu tuttu quì principiò

Tali a mani chi vensi in tempu d'ancu à fà
E vi feci d'altura cù quiddu arti supranu
Un era ancu lu mondu é n'erati digià
Guardiani impitrati di u ricordu umanu

Tali l'abbracciu primu chi u silenziu vi deti
E li sapienzi arcani cù li so canti immersi
Di ciò chì ùn hè storia tiniti li sicreti
Tali una citatella chi a mimoria persi

E muntagne d'Ese

(Ghj.P. Poletti/M. Lamioni)

Qui sò surgenti curtese
È di lume l'eternu sugiornu
Quassù per e muntagne d'Ese
Sè tù ci torni mai un ghjornu
Di silenziu n'aghju un tesoru
È un ricordu di quelli ochji d'oru

Quì cantanu mille fole
A' e frebbe d'inguernu intrecciate
Da Tarmini à Scaldasole
A Foce d'Astra calma in le fruppate
Di bellezze n'aghju un tesoru
È un ricordu di quelli ochji d'oru

Quandi ferraghju ni hè chjosu
In le furie di i venti suprani
Altieru canta Renosu
Cun centu cialambelle in le mani
D'armunie n'aghju un tesoru
È un ricordu di quelli ochji d'oru

Di sogni è d'orizonti
N'aghju li prufumi discreti
Di l'Amicizia di'ssi monti
Ne tengu i quaterni secreti
Di sole è ventu n'aghju un tesoru
È un ricordu di quelli ochji d'oru

U valdu di a lama

(Paoli lu Soriu/E. Gineste)

Da lu valdu di a lama
Scrivar vogliu sta nuvella
Per mandalla par vallonu
Ad'Anghjulina a mio surella
Ch'ella stighi alegra è cuntenti
Ch'ùn li mancarà niente.

Lu me poghju di Perettu
Lu vogliu tuttu impiigà
O lu me prima sughjettu
Lu me ziu Antonu Scia
Lu so vinu mani è sera
Mai li vurrà mancà.

Tra mè è Antonu Tabura
Ci era statu un sott'intesu
À la dispensa di Bura
Verificatori di pesu
Legnu scorsa è carbonu
À mità incù lu patronu.

Poi ci hè Dariu Pulindinu
Chì hè un omu di gran'valori
Ad'eddu ùn li piaci più vinu
Ùn bii più chè licori
La so sola midicina
Ni saria Fillippina.

Poi ci hè Paulu Castillinu
Chì hè omu di a me famidda
Hè asatu in la muntura
È li tinarà la bridda
À lu cavaddu filatu
Quand'è saraghju spusatu.

O lu to nomu Pazzali
Tona in tuttu in lu vangonu
Agna, Bura è Chisà
Facini un forti risonu
Sona cetera è viulinu
Par ludar à Pulindinu

Poi ci hè Ghjacumu Scia
Chì hè struitu è di bon senzu
U faremu sicritariu
D'altri cosi lu dispensu
È sarà pagatu a tara
À la banca di Chisà.

À Lillu a me sputagna
Li segnu lu passaportu
Di cullar à la muntagna
Ch'eddu ùn si lasci fà tortu
Alta pulizza è baronu
Da lu Tortu à lu Cuscionu.

A dota

(M. Cacciaguerra/E. Gineste)

(Tradiziunale orezzincu)

Mamma hè vechja è sola in casa
Dunque mi trovu obligatu
Piglià moglia s'eiu la vogliu
Per ùn marchjà più strappatu
Tutti mi danu cunsiglii
S'eiu la trovu ch'eiu la piglii

Quist'annu vogliu piglià moglia
Ch'aghju una bella piantata
Suminata hè à sette libra
Spergu in Diu sia bona annata
Mamma ùn pò in casa è fora
Ci vole ch'eiu ghjunghji una nora

Noi simu dui fratelli
À sparteci un gran'casale
U primu chì si marita
Piglierà induve ella li pare
È parti l'hà fatte mamma
Testimoni ùn si hè chjama

Si ella hè quante à la mubiglia
À mè nunda n'ùn mi manca
Aghju lu mio tavulinu
A mio meria è a mio panca
Una bella caffittera
Quattru piatti è una suppera

In qualità di vestume
Propiu nunda nùn mi manca
Aghju duie camisgiole
Una hè brutta è l'altra hè bianca
Hè vera scarpi ùn hè aghju
Quist'annu li cumpreraghju

Dinò ci vole ch'eiu mi compri
Un pezzacciu di barretta
Un paghju di pantaloni
Un ghjileccu è una ghjacchetta
È pò allora aghju ogni cosa
Ùn mi manca chè la sposa

Aghju un bellissimu lettu
Di li più fine castagnu
Ci hè cuvertoghje è lenzole
Di cuprimi nùn mi lagnu
Aghju un bellu strapuntinu
Un saccone è un cuscinu

Quì finiscu o damicella
À ludavvi u mio casale
Sè voi vulete fà un capricciu
Incu mè ùn ci starete male
Eiu voi fratellu è mamma
Serà pane biancu in brama

Beal feirste

(M. Cacciaguerra/E. Gineste)

(accordéon: Riccardo Tesi)

Un ghjornu per furtuna scalai in quelli lochi
À vede cristiani piattassi per pregà
Un Diu chì n'ùn pò chè interra i so morti
Circhendu cumu fà

Per scioglie'ssa disgrazia ch'elli chjamanu guerra
Trà fratelli di sangue è nò di civilità
Ognunu sottumessu per forza à la Regina
Chì ci vole a rispettà

Beal feirste sì cità marturiata
Beal feirste o chì vita straziata

Mà in st'isula pinta di mare è di virdura
Ci hè una ghjente di core chì soffre u so campà
Senza nisuna stizza per la so sepultura
U celu a saperà

Cum'è cresce la luce quella mane à bon'ora
Trà luna vechja è sole omu ùn si pò sbaglià
E Cumu sceglie l'omu à mezu à la nigrura
A vita libera

Beal feirste si cità marturiata
Beal feirste o chì vita straziata

È puru di'ssu mondu tutti nè sò fieri
Di pretende salvà a nostra umanità
Ùn fideghjanu chè l'altri paesi strangeri
Bramendu a libertà

O populu d'Irlanda fà sunà u viulinu
Tamburi è caramusa per pruvà d'innacquà
L'avvene chì ferà girà u mulinu
Di a to fraternità.

Beal feirste sì cità marturiata
Beal feirste o chì vita straziata
Beal feirste sì cità marturiata
Beal feirste o signore pietà.

In memoria

(F. Raffali & N. Luciani/E. Gineste)

Per un populu vivu
Chì un vole esse domu
Per un zitellu chì dumane
Serà omu
Per quellu chì d'amore
Vole pudè campà
Per quellu chì in prigiò
Ùn ci hà nunda à chì fà

Per stu pezzu di terra
Chì deve firmà nostru
Per stu celu turchinu
È stu mare d'inchjostru
Per una casa vechja
Chì ùn vole sprufundà
Per una strada nova
À meza oscurità

Ùn aspetta dumane
O fratè, ùn aspetta
Quale ella sia a manera di lotta
Dumane

Per l'omu affunatu
O schiavu di un patrone
È chì deve piegassi
À ciò ch'ellu l'impone
Per quellu chì dumane
L'impiegu perderà
Per una donna
Chì si vole liberà

Per tutti quelli chì
Un ghjornu sò cascati
À un campu d'onore
Feriti marturiati
Luttendu per a patria
Vulendula salvà
Per a nostra memoria
Chì ci aiuta à sperà

Ùn aspetta dumane
O fratè, ùn aspettà
Quale ella sia a manera di lotta
Dumane

Più chè u sole

(Ghj. Fusina & Ghj.F. Leschi/E. Gineste)

Più chè u sole è più chè u mare
A lingua st'isula l'hà fatta
À tempu à una sorte matta
Più chè u sole è più chè u mare.

Da la so lingua hè cum'è nata
Da la so voci è li so canti
Da li so scritti tutti quanti
Chì l'anu vestuta da fata
Da la so lingua hè cum'è nata.

Sò'sse parulle à falla viva
Di li pueta tutti pari
Ch'ella hà tenuti cusì cari
Da l'alta serra à longu riva
Sò'sse parulle à falla viva.

Puru la più bella natura
Hè pocu senza puesia
Per esse ognunu qualchissia
Da l'altri ne vole primura
Puru la più bella natura.

Hè strappatura ancu l'amore
Sottu à u silenziu di u celu
Hè mutu u sintimu sinceru
S'ellu ùn hà musica à u core
Hè strappatura ancu l'amore.

Donna nera

(Traduction de Ghj.P. Poletti/E. Gineste)

Donna, donna
Di pelle difesa
Induve vai à rigiru di notte
In li pini, in li pini
La mio deda incesa
À u ventu di qualch'immense lotte

Donna, donna
Di l'ochji à la luna
Dimmi tù qualchì verde campile
In le fole, in le fole
Di bona furtuna
Induve si dorme senza fucili

Donna, donna
Di le to ferite
N'aghju fattu un cantu d'amore
Per i ghjorni, per i ghjorni,
Di e mosse tradite
Di turnà à imbellisce l'ore

Donna, donna
Induve vai tù ?

Lettera d'Argentina

(F. Lanfranchi & N. Luciani/E. Gineste)

(Bandonéon: César Stroscio)

I loca di quì
Sò fatti à lu to parè
Vularia chì
Tuttu firmessi par mè
Ma u tempu si sbucina
In'ssa terra d'Argentina

Quale à pò sapè
Chi hè la mio vita avà
Qualcosa di tè
Chi fermà in li ghjorni à fà
Chì lu me passu strascina
In'ssa terra d'Argentina

Com'è l'armunia strana
Chì risona tantu è più
Com'è a terra luntana
Di a nostra giuventù
Com'è quidda casa vechja
È lu paesi culà
Com'è tanti fole à veghja
Chì tu sapii cuntà

À chì po ghjuvà
Di ramentassi dinò
È chì firmarà
Di li ricordi chì sò
Chjusi in l'ora citadina
Di sta terra d'Argentina

Tuttu ciò chì fù
Ùn mi ne possu scurdà
Ma dimmila tù
Chì ferma in li ghjorni à fà
Chì lu me passu strascina
In'ssa terra d'Argentina

Com'è a piazza tamanta
Duve andavamu à ghjucà
Com'è 'ssa risa chì ùn pianta
In fondu à mè di chjamà
Com'è li passi sicuri
Chì tu purtavi quassu
Com'è li chjassi primuri
Di la noscia giuventù

È tù...

Tù dumenicu

(Ghj.P. Poletti/M. Lamioni)

D'ottobre in zerubia a luna hè cusì bella
È u ventu in furesta viulineghja in li pini
A notte di vaghjime aspetta un'antra stella
Da i Martini à Siò marchjanu clandestini

E tù Dumenicu, ribellu di cugnome
Chì ùn vulia mai dorme

E vostre le vittorie eranu silenzione
A gloria a sai bè, ùn canta chè u ghjornu
Quantu funu i cumpagni di 'sse mosse furiose
Chì partianu fieri senza pregà ritornu

E tù Dumenicu, ribellu di cugnome
Chì ùn vulia mai dorme

È oghje senti di chì ogni passatu hè mortu
Chì li fiori s'annoianu nantu à e tombe vechje
Chì hè megliu à ùn circà quale chì avia tortu
S'imbrutta la memoria in certe bocche techje

E tù Dumenicu, ribellu di cugnome
Chì ùn vulia mai dorme

Oghje nantu à 'ssi chjassi pascenu i muntoni
Di quandu in quandu i neri intisgianu i bianchi
Chì dicerianu avà Giusti è Mondoloni
È tutti i to fratelli cù i sò fucili stanchi

E tù Dumenicu, ribellu di cugnome
Chì ùn vulia mai dorme

D'ottobre in Zerubia a luna hè cusì bella
È u ventu in furesta viulineghja in li pini
A notte di vaghjime aspetta un'antra stella
Da i Martini à Siò marchjanu clandestini

Tù dumenicu
Ribellu di cugnome chì ùn vulia mai dorme

Diana di l'alba

(Tradiziunale zicavese/E. Gineste)

Diana di l'alba
Stella nel'celu vermiglia
Sè tanta bella
Chè sei la maraviglia
Tù sei com'è la farfalla
Induve lu focu s'appiglia.

Eo non sò lupu,
Nè voi agnella seti
Datemi un basgiu,
Chì tanta bella seti
Sè nisunu ùn lu pò spigna,
Voi spigna lu pudeti.

Quandu lu ghjattu,
Farà pace incù lu topu
L'onde del mare
Si siccaranu al fondu
L'onde del mare nòn seccanu mai
È voi podreti succora à li me guai.

Llego con tres heridas

(M. Hernandez)

Llego con tres heridas,
La del amor, la de la
muerte, la de la vida.

Con tres heridas viene
La de la vida, la del
amor, la de la muerte.

Con tres heridas yo
La de la vida, la de la
muerte, la del amor.

Rimori

(Natale Luciani)

Rimori, rimori
Rimore d'un tempu andate
Ribomba in mè

Rimori, rimori
Rimore d'un sangue caldu
Mischiatu in mè

Paradisu o infernu
Per una giuventù
Tela di sempre eternu
O purtellu apertu
Paradisu o infernu
Salvezza o servitù ?

Rimori, rimori
Di rabbie assuffucate
Tremanu in mè

Rimori, rimori
Tante voce spurgulate
Vicinu à mè

Paradisu o infernu
Per una giuventù
Tela di sempre eternu
O purtellu apertu
Paradisu o infernu
Salvezza o servitù ?

Haut de page